300 manteis na hostalaría para o Día de Rosalía

O vindeiro mércores 23 de febreiro celébrase o Día de Rosalía, conmemorando o aniversario do seu nacemento. No marco dunha campaña da Deputación de Pontevedra, o Concello de Bueu repartirá 300 manteis rosalianos entre a hostalaría local para celebrar a efeméride. Os establecementos interesados en contar cos manteis deben achegarse a partir do luns ao segundo andar da Casa do Concello. Tal e como informa o Concello, a entrega será por orde de petición ata esgotar existencias e baixo o compromiso de colocar os manteis o mércores.

Deseño dos manteis que se repartirán para o Día de Rosalía.

O deseño dos manteis está baseado no "Caldo de Gloria" de Rosalía, no que a gastronomía tradicional galega é a protagonista, xunto a súa simboloxía social e humildade. Os manteis tamén inclúen o poema "Miña casiña, meu lar" de Follas Novas.

Nárrase a historia dunha muller pobre que conta o seu día para sobrevivir, indo de Santiago de Compostela a Padrón. A pesar de que carece de todo e de que os seus avaros veciños lle negan o que lles sobra, consegue o milagre da supervivencia: facer un humilde caldo de gloria e un bolo do pote. A historia tamén mostra como, con case nada, o ser humano é quen de sobrevivir e ser feliz. "Queremos que Galicia lembre a Rosalía no seu día compartindo en lugares públicos ou no ambiente familiar este caldo dos humildes", conclúen.