Conta atrás para o Entroido
A última vez que os disfraces e as melodías das comparsas "conquistaron" Bueu foi en marzo de 2020. A chegada da pandemia impediu a celebración do Entroido de 2021, pero este ano as actuacións e actividades regresan a partir de mañá, nun formato reducido e adaptado á situación sanitaria. A pesar de renunciar aos desfiles, o espírito do Entroido chegará ás rúas e parroquias bueuesas.
A programación oficial, organizada polo Concello e en colaboración cos colectivos, comeza mañá coa actuación das comparsas na Praza Massó, ás 12:30 horas do mediodía. Será o momento no que se desvelen as letrillas nas que veñen traballando nos últimos meses e que sempre chaman a atención do público.
Pola tarde, o adro de Cela será o escenario dunha festa infantil organizada pola Asociación Cultural Costumes de Cela. Será ás 18:00 horas e tamén se desprazarán as comparsas, para animar a tarde. O domingo repítense as actuacións de novo ás 12:30 horas na Praza Massó, mentres que pola tarde terán lugar na Morada, en Meiro.
Outro dos piares deste Entroido serán as actividades para a cativada. Do luns ao mércores, a carpa da Praza Massó acollerá uns obradoiros infantís impartidos polo artista local Tino Resille. Os rapaces e rapazas poderán gozar de xogos e actividades, de 10:00 a 13:00 horas, así como participar na elaboración do tradicional "Paxaro de Mal Agoiro". Para asistir é necesario inscribirse a través dun formulario que xa está dispoñible na web municipal.
A próxima fin de semana comezará cunha actuación das comparsas o sábado na Praza de Massó. Ese mesmo lugar acollerá unha festa infantil de disfraces ás 17:30 horas, na que por primeira vez haberá persoal especializado en necesidades especiais. A xornada remata coa música comparseira no Parque Joe Novas de Beluso ás 18:00 horas.
A programación finaliza o domingo 6 de marzo, cun pasarrúas e unha "queima do paxaro" simbólica, renunciando ao tradicional desfile.
Comentarios