O Concello mellorará a accesibilidade na Banda do Río tralo informe da Asociación Juan XXIII
A mellora da accesibilidade da vila está máis cerca despois de coñecer os resultados do Informe de Accesibilidade Cognitiva realizado pola Asociación de Persoas con Discapacidade Juan XXIII sobre a zona da Banda do Río. A concelleira de Promoción Económica e Turismo, Silvia Carballo, mantivo unha xuntanza nos últimos días con representantes da asociación para coñecer os resultados do informe.
Entre as medidas recollidas no documento figuran a adaptación da cartelería cun tamaño de letra suficiente así como un bo contraste entre figura e fondo. Tamén consta o emprego de fácil lectura nas comunicacións e o uso de pictogramas identificativos en cada infraestrutura.
O informe da Asociación Juan XXIII destaca a importancia de converter os espazos en accesibles. "Segundo a Declaración dos Dereitos Humanos de 1948, toda persoa ten dereito a descansar e gozar do tempo libre, gozar da natureza, e como non, das praias con todas as garantías de participación”, apuntan.
Por ese motivo, o Concello considerou a Banda do Río un lugar idóneo para implementar o proxecto, ao confluír a praia, o parque, o paseo e o estaleiro. O obxectivo é, posteriormente, estender estas iniciativas a outros espazos e infraestruturas municipais. "Queremos construír un Bueu totalmente inclusivo e accesible para todas as persoas", reivindica a edil.
A concelleira móstrase moi ilusionada por este proxecto piloto, que tivo inicio no 2020. Contamos coas entidades que traballan a prol da inclusión social nos diversos eidos", explica. Por ese motivo, mantivo reunións coa Confederación Galega de Persoas con Discapacidade (COGAMI), a Asociación de Xordos de Galicia (XOGA) ou a ONCE.
Comentarios