Asbel pon en marcha o seu club de lectura, con reunións mensuais e aberto á participación
A Asociación por Beluso (Asbel), que en marzo cumprirá un ano en funcionamento, vén de poñer en marcha un novo proxecto: "O recuncho literario de Asbel". Este proxecto, que segue a filosofía da asociación para recuperar a vida veciñal, foi presentado onte na Casa do Pobo de Beluso. A veciñanza puido coñecer os detalles desta iniciativa, que terá unha reunión cada mes e que pretende ser máis que un club de lectura tradicional.
O nacemento deste proxecto literario ten que ver co interese veciñal pola lectura, botando en falta un grupo para debater e compartir opinións en conxunto. Tal e como apuntou a responsable deste proxecto, non se trata dun club de lectura tradicional. "Queremos ir un pasiño máis", afirmou. Deste xeito, ademais dos debates tamén se propoñerán obradoiros ou incluso roteiros.
O recuncho literario está aberto a todo aquel que queira participar e que teña como gusto a lectura. Precisamente, serán os veciños e veciñas os que decidan, entre todos, as temáticas e títulos dos libros para o club. Algúns dos ámbitos que se mencionaron onte foron, por exemplo, a historia local e a inmigración e emigración.
Este novo espazo non só procura o goce da lectura, senón tamén a promoción da literatura en galego e o emprego das bibliotecas co seu servizo de préstamo. A liña da propia asociación tamén procura establecer vínculos positivos entre os asistentes.
As reunións deste grupo, que pretenden ser participativas, realizaranse o terceiro xoves de cada mes, de 20:30 a 21:30 horas. Tamén se terá en conta a flexibilidade e se fora preciso por algún motivo, podería variar o día. Desde onte, a literatura ten un novo espazo propio en Beluso.
Comentarios