Aurita Reiriz, "Bueuesa Senlleira"
Unha muller da illa de Ons protagoniza a homenaxe "Bueuesa Senlleira" deste ano. Ela é Aurita Reiriz. "É a memoria viva dunha sociedade desaparecida, a de Ons, e da nosa cultura máis viva ca nunca, a das pandereteiras". Así a definen desde o Club Golfiños, colectivo encargado da organización deste recoñecemento. O acto será este venres ás 20:00 horas no Centro Social do Mar, coincidindo coa presentación do cuarto número de "Aña. Fanzine de (des)identidades femininas de Bueu".
A elixida para este ano, Aurita Reiriz, chegou a ser fareira da Illa de Ons, ademais dunha das derradeiras pandereteiras do municipio bueués. "É un novo e merecido recoñecemento ao longuísimo labor de Aurita e de todas as mulleres que empuñaron a pandeireta para reclamar o seu lugar na escena da vida", afirman desde o Club Golfiños.
Precisamente, Aurita recibiu diferentes recoñecementos ao longo da súa vida. No 2009 o Concello de Bueu, a través do CIM, publicou un documental sobre as mulleres de Ons, onde Reiriz narra o seu labor como fareira. Unha década despois, no 2019, foi homenaxeada na propia illa e, de novo, no 2021 xunto a todas as pandereteiras de Ons, nun acto organizado polo Concello e executado pola asociación Arredor da Tradición.
Trátase da quinta edición do recoñecemento "Bueuesa senlleira", que xa homenaxeou a Míriam Ferradáns, Nico Elsker, Curucha Davila e á familia das Xulianas, poxadoras de peixe.
Comentarios