Dous veciños de Bueu participan no Campionato de España de MMA

Carlos Fabián Thiebaut e Alexander-Delmiro Costas, do Clube de Loita do Morrazo, participarán esta fin de semana no Campionato de España de MMA (artes marciais mixtas), que se celebrará en Madrid. Esta mañá, ambos deportistas foron recibidos na Casa Consistorial polo edil de Deportes, Ricardo Verde.

De esquerda a dereita, o presidente do Clube de Loita do Morrazo, Carlos Fabián; o edil de Deportes, Ricardo Verde e o participante no campionato Alexander-Delmiro Costas. Imaxe: Concello.

Carlos Fabián Thiebaut, actual presidente e adestrador do Clube de Loita do Morrazo, participará no campionato como árbitro, mentres que Alexander-Delmiro Costas competirá na categoría senior, na que se estrea con ilusión. "É a primeira vez que participo e hai posibilidades", destacou Costas. Pola súa parte, o edil de Deportes, Ricardo Verde, animou aos deportistas a "competir con ganas" durante este campionato clasificatorio.

O MMA fai referencia ás siglas en inglés de "artes marciais mixtas", que combinan técnicas de diversas artes marciais e deportes de combate. O Clube de Loita do Morrazo ten sede no Pavillón Pablo Herbello, onde leva anos impartindo clases de disciplinas como a loita grappling, MMA, defensa persoal feminina ou karate para cativada e persoas adultas.