O Concello acondiciona varios aparcadoiros e reforza o plan de limpeza para a Festa das Alfombras
Bueu acolle este domingo a Festa das Alfombras Florais, un evento para o que xa están listos os preparativos. Desde o goberno local indican que levan semanas reforzando o plan de limpeza das vías municipais, tanto do casco urbano como das parroquias, ademais do acondicionamento dunha serie de aparcadoiros públicos e gratuítos, que permiten sumar máis de 500 prazas. Precisamente, esta fin de semana está prevista a apertura do aparcadoiro situado no lugar do Norte.
Esta mañá, o alcalde Félix Juncal, a concelleira de Promoción Económica e Turismo, Silvia Carballo e o edil de Cultura, Medio Ambiente e Mobilidade, Xosé Leal, supervisaron algunhas dos obras para comprobar que "todo está a punto para estes días e para os próximos eventos.
Desde o consistorio animan á cidadanía a empregar os aparcadoiros disuasorios e a evitar a circulación innecesaria polo centro, xa que as rúas Pazos Fontenla, Eduardo Vicenti, Montero Ríos e Francisco Escáneo lucirán as alfombras elaboradas pola cidadanía. Os aparcadoiros disuasorios sitúanse na rúa A Pedra, no pavillón Pablo Herbello, A Ramorta, Pazos Fontenla, Pescadoira, As Lagoas, Ferrolán, Castelao e súmase o aparcadoiro do Norte, que se abrirá esta fin de semana tralo remate dos traballos de acondicionamento da primeira fase.
Plan de limpeza e de tráfico
Outra das actuacións supuxo o reforzo da limpeza e a roza de vías municipais, así como o inicio do baldeo polas estradas e beirarrúas do casco urbano. O rexedor, Félix Juncal, destaca "o traballo ao longo destes días e semanas do persoal das brigadas municipais e das empresas contratadas polo Concello na execución das obras e traballos das últimas semanas". Tamén se activará un dispositivo de limpeza para o domingo despois da procesión do Corpus.
Así mesmo, tamén está activado un dispositivo de tráfico para esta fin de semana. Está prohibido estacionar a partir das 15.00 horas do sábado na rúa Pazos Fontenla, entre Castelao e Francisco Escáneo, e na rúa Montero Ríos, entre Francisco Escáneo e a entrada da Praza de Abastos. Neses mesmos tramos quedará restrinxida á circulación o sábado ás 17.00 horas.
Comentarios