O paro sitúase en 750 desempregados na vila en xaneiro, un menos que o mes anterior

O primeiro rexistro do paro do ano amosa unha estabilización no número de desempregados no municipio. Bueu rexistra 750 desempregados en xaneiro de 2022, un menos que en decembro de 2021.

A comparativa anual confirma a tendencia á baixa no número de parados, xa que son 98 persoas desempregadas menos que en xaneiro de 2021. Cómpre mencionar que a situación naquel momento era diferente, con maiores restricións e máis persoas afectadas polos ERTE derivados da pandemia. Para ser máis precisos, a comparativa con xaneiro de 2020 (antes da pandemia), tamén é positiva. En aquel momento había 767 persoas paradas na vila, 17 máis que neste momento.

Como vén sendo habitual, os datos de desemprego ofrecen un desglose segundo diferentes criterios. En xaneiro de 2022, Bueu contabiliza 26 parados menores de 25 anos, dous máis con respecto a decembro. O descenso prodúcese nos maiores de 25 anos, que pasan a ser 724 desempregados, 3 menos que no rexistro anterior. No referente ao sexo, hai 310 homes (un menos) en busca de emprego e 440 mulleres (sen variación).

Por sectores, a baixada do número de parados prodúcese na industria (catro menos) e nas persoas sen emprego anterior (tres menos). Nas demais áreas produtivas prodúcense incrementos moi leves. A agricultura e a pesca suma dous desempregados máis, a construción tres e o sector servizos un.

Situación na comarca

A comarca do Morrazo rexistra en xaneiro 5.262 persoas en busca de emprego, 54 menos que no mes anterior. Todos os municipios do Morrazo comezan o ano cun descenso no rexistro de parados, agás Moaña que suma 5 parados. Cangas rexistra 21 parados menos e Marín, pola súa parte, 37.

Unha ollada a Galicia

A directora xeral de Formación e Colocación, Zeltia Lado, valorou esta mañá os datos de desemprego en Galicia, onde destacou que a comunidade acumula dez meses consecutivos de caída do paro na evolución anual. A Consellería de Emprego informou esta mañá de que Galicia pechou xaneiro con 153.932 persoas sen emprego, a cifra máis baixa de paro acadada no primeiro mes do ano de toda a serie histórica (1996).