Staffan Mörling dá nome a un campionato de dornas a vela
A memoria do "sueco de Ons" así como a súa vinculación coas embarcacións tradicionais e a cultura mariñeira continúa a medrar. O antropólogo Staffan Mörling, falecido en maio de 2020, dará nome a unha campionato de regatas de dornas a vela. "Copa Mörling" é o nome co que a Federación Galega pola Cultura Marítima e Fluvial (Culturmar) retoma a extinta "Copa Galicia de dornas a vela" e co que quere agradecer o labor realizado polo sueco a prol das embarcacións tradicionais galegas.
"Non hai mellor forma de homenaxear a figura deste bueués de adopción que fomentando a exhibición de saberes de navegación tradicional e de embarcacións que supoñen as regatas de dornas a vela", sinalan desde Culturmar. Precisamente, o acto de presentación da primeira edición da copa foi no Museo Massó. Alí estivo o edil de Cultura, Xosé Leal, que recordou a importancia de Mörling, nomeado fillo adoptivo da vila en 2006. "O legado de Mörling sempre estará vivo mentres haxa embarcacións no mar", afirmou Leal.
A "Copa Mörling" albergará cinco regatas de dornas a vela entre os meses de xullo e agosto. Serán nas vilas de Portonovo (18 de xuño), Cambados (2 de xullo), O Grove (30 de xullo), A Illa de Arousa (6 de agosto) e Combarro (27 de agosto).
Este evento procura lograr unha maior difusión da importancia das dornas como patrimonio material e da súa navegación como patrimonio inmaterial. O presidente de Culturmar, Xosé Luis Sacau, destacou que "a finalidade última é a convivencia e a cooperación entre embarcacións e colectivos de diferentes partes de Galicia". Así, a "Copa Mörling" servirá para afianzar a unión e xerar impacto turístico nas vilas costeiras que albergan as regatas. "Queremos barcos vivos no mar, non mortos nas rotondas", rematou Sacau.
Comentarios