Un estudo demostra a importancia da bioturbulencia dos peixes con datos obtidos en Bueu
A revista científica Nature Geoscience vén de publicar un novo estudo que demostra a contribución dos peixes para a produción de turbulencia e mestura oceánica, evidenciando a súa importancia na distribución de calor, nutrientes e osíxeno. Os datos que se empregaron nesta investigación foron obtidos fronte á costa de Bueu a través do proxecto "Remedios", no verán de 2018, no que participou persoal científico do Centro de Investigación Mariña (CIM) da Universidade de Vigo.
Tal e como informa o Diario Dixital da Universidade de Vigo (DUVI), a investigación conta con gran relevancia, xa que ata o momento a comunidade científica demostrara que outros elementos como os ventos e as mareas subministraban a maior parte de enerxía que impulsa a mestura das capas que forman os océanos, pero non se puidera demostrar a contribución de organismos como os peixes a este fenómeno. Os resultados do estudo conforman a primeira evidencia dunha mestura oceánica impulsada bioloxicamente, baixo o nome de bioturbulencia.
Quince días fronte á costa bueuesa
Para obter os datos, o persoal científico embarcouse no buque oceanográfico Ramón Margalef, no véran do 2018. Alí pasaron quince días nos que medían cada media hora a turbulencia e mestura das augas, ao longo do día e da noite.
A investigadora principal do proxecto "Remedios", Beatriz Mouriño, sinala que as observacións xurdiron de maneira "fortuíta", xa que a campaña tiña como obxectivo estudar como afecta a turbulencia á vida mariña. "Acabamos demostrando que a vida mariña pode influír na turbulencia oceánica, que á súa vez inflúe na vida mariña!", explica.
O equipo científico comprobou como cada noite se incrementaba a turbulencia na auga. Cun perfilador de microestruturas verificaron que "dende o anoitecer ata o amencer, as medidas indicaban que, baixo os nosos pés, desde uns 10 a 30 metros de profundidade, se estaba a producir unha bioturbulencia moi intensa, comparable á que pode xerar unha tormenta sobre a superficie do océano", engade Mouriño.
Coa información acústica e as mostras das redes atribuíron esa turbulencia á presenza de bancos de peixes que se concentraban pola noite na zona, como o bocarte.
Así, este estudo revela que, aínda que a mestura biolóxica pode non ser moi significativa no océano aberto, si pode ser importante nos ecosistemas costeiros á vez que destaca a capacidade dos organismos vivos para influír e remodelar o medio físico onde viven.
O artigo está asinado por Bieito Fernández, da Universidade de Southampton como primeiro autor, xunto aos investigadores do CIM-UVigo Beatriz Mouriño, Esperanza Broullón e Antonio Comesaña. No estudo, ademais do CIM, tamén participou un equipo de institucións como o Instituto Español de Oceanografía ou o Swiss Federal Institute of Aquatic Science and Technology.
Comentarios