A Festa do Polbo será do 13 ao 15 de agosto e as tapas soben dous euros polo aumento dos prezos
A organización da XXI Festa do Polbo continúa a avanzar despois de dous anos en obrigada pausa pola pandemia. O evento gastronómico celebrarase os días 13, 14 e 15 de agosto nos Xardíns de Urbano Lugrís, na zona das Lagoas. Así o acordaron a concelleira de Promoción Económica e Turismo, Silvia Carballo, e os representantes da hostalaría que participarán no evento.
Nesa mesma reunión tamén se revisaron os prezos das diferentes especialidades. As racións máis pequenas pasarán de 6 a 8 euros, mentres que as máis grandes, de 10 a 12 euros. É unha das consecuencias do encarecemento dos produtos que se está a vivir, algúns como o aceite que inflúen na elaboración dos pratos. "Queremos manter os prezos populares, pero non podemos obviar que nestes dous anos se encareceron os produtos", destaca Carballo.
Outra das novidades desta edición será a presenza da IXP Ribeiras do Morrazo, que se unirá á habitual carta de viños. "Supón valorizar unha marca na que se inclúe o noso Tinta Femia", apuntou a edila ao remate da reunión.
Desde a Concellaría de Promoción Económica e Turismo indican que seguirán traballando na organización do evento que persegue poñer en valor o Polbo das Rías coas especialidades gastronómicas, pero que tamén inclúe actividades culturais e de promoción do cefalópodo, que se darán a coñecer nos vindeiros meses.
Comentarios