O persoal sanitario do centro de saúde recibe formación para previr a violencia de xénero

Despois do comezo a semana pasada dos obradoiros de igualdade nos centros educativos, esta mañá foi a quenda do persoal sanitario do centro de saúde da vila. A médica viguesa Rosana Izquierdo foi a encargada de impartir unha charla sobre as pautas de actuación na atención primaria, así como o protocolo da violencia de xénero.

Esta actividade enmárcase dentro dun programa que leva adiante o Concello de Bueu, a través do Centro de Información ás Mulleres e para o que conta con fondos do Pacto de Estado Contra a Violencia de Xénero. A poñente, Rosana Iziquierdo, é médica de atención primaria en Vigo e responsable do grupo de traballo de violencia de xénero da Asociación Galega de Medicina Familiar e Comunitaria (AGMFEC).

Na apertura da xornada desta mañá tamén participou o alcalde da vila, Félix Juncal. O rexedor aproveitou a ocasión para agradecer o labor dos sanitarios e sanitarias da sanidade pública como "piar fundamental para concienciar, detectar e previr esta lacra social das violencias machistas", sinalou. Na mesma liña expresouse a edila de Benestar Social e Igualdade, Ana Isabel Otero. "Debemos poñer todos e todas o noso gran de area nesta loita, e aí o Concello sempre está axudando e propoñendo actividades de sensibilización e formación", recalcou Otero.

Un momento do coloquio desta mañá sobre violencia de xénero no centro de saúde.

Estas xornadas formativas inauguráronse no 2019, con sesións para corpos de seguridade, persoal sanitario, profesorado e cidadanía en xeral. As accións procuran avanzar cara unha sociedade máis xusta e igualitaria á vez que se pretende dar cumprimento ao recollido nos plans de igualdade aprobados polo Concello de Bueu, que sinala a súa aposta pola educación e formación como piar básico na loita contra as violencias machistas.