O PP destaca o potencial cultural da vila e demanda unha "programación máis ampla" ao goberno local
A Comisión de Cultura do PPdeG, presidida polo bueués Daniel Chapela, visitou onte diversos lugares da vila como as mámoas de Castiñeiras ou o Museo Massó, ademais de manter unha reunión co FICBUEU. Neste acto tamén participaron o presidente provincial do PP, Luis López; a voceira local, Elena Estévez; o director de Agadic, Jacobo Sutil e membros do grupo municipal do PP. Xuntos reivindicaron o "potencial cultural" da vila e do cinema galego á vez que solicitaron actuacións como "unha programación cultural" máis ampla por parte do goberno local e a aprobación do PERTE cultural ao goberno central.
"A Xunta de Galicia traballa arreo na cultura galega, do que é unha mostra clara o investimento que se vai facer nestes anos na vila de Bueu", expresou o presidente provincial. López fixo alusión á achega de 1.1 millóns de euros para a ampliación do Museo Massó, que se atopa en fase de licitación e cuxas obras empezarán o vindeiro ano, así como aos 200.000 euros destinados á creación da sala arqueolóxica do Bueu romano.
PERTE cultural
Na súa intervención, o presidente da Comisión insistiu, como en anteriores ocasións, na solicitude ao goberno central da aprobación do PERTE cultural. "Preparouno a Xunta de Galicia xunto ao sector con consenso e permitirá un investimento de 400 millóns de euros neste ámbito, que representa o 3% do PIB de Galicia e un 3.6% do emprego", explicou Chapela.
Máis programación cultural na vila
A outra demanda centrouse na programación cultural da vila levada a cabo polo goberno local. A voceira do PP de Bueu, Elena Estévez, apuntou á riqueza cultural da vila e destacou a "falta de propostas e iniciativas do goberno, que vai nun papel secundario". A popular demanda a BNG e ACB unha "programación anual, máis variada e ampla e para todas as franxas de idade". Así, indicou que nas comisións informativas dos tres últimos anos "non houbo ningunha proposta do goberno nin da concellaría de Cultura".
A voceira tamén reivindicou "unha nova política de xestión dos espazos patrimoniais" e puxo como exemplo o estado das mámoas de Castiñeiras e da ruta dos muíños do Canudo. "Son inaccesibles pola maleza, tendo a súa cartelería ilexible e sen accións por parte da concellaría de Patrimonio para a súa posta en valor", concluíu.
Pero como se pode ser tan hipócrita e demagogo?? Acaso ninguén lembra o ermo cultural da etapa en que Elena gobernou?? Ou o exterminio da cultura galega levado a cabo desde o 2009 con Feijoo á cabeza e, agora, con Rueda!? Xa deixando á parte o apoio furibundo deste mesmo Rueda no 2009 a todas as manifestacións da asociación antigalega “Galicia Bilingüe“, reconvertida agora na abertamente xenófoba “Hablemos Español”. Que fala de cultura, logo, o señor Durán Chapela? Ou fala por hipocrisía ou, máis ben, por ignorancia (súa, ademais da que pretende para a cidadanía).